تماضر الخنساء حمزة...كلامك اصبح جافي

من طرف **jassim** الثلاثاء يناير 30, 2018 12:08 pm

حتى كلامك أصبح جافي ..

ونبض الشوق إتوارى و..عدَّى

أصلو الكان بيناتنا منافي

رغم الحزن الساكن ضلك

قلبي بيغفر ..ولسع صافي ..

ورغم الريد الودَّر دربو ..

كل الغلط المنَّك ..عافي

وكل الجاي من زولاً زيَّك

مُرو نشوفو..الطيب وشافي

صعبة الكلمة تغادر جوفنا..

تجرح حتَّى المعنى الخافي ..

وساهلة الكلمة حنينة بتمرق ..

تدِّي الطيبة ..الفيكا ..مرافي.

أنا بي ريدك لسع عايش

وإنتا الريدك ليَّ خرافي

وأنا بي شوقك قلبي بينبض

ونبضك شوقو أصبح مافي

جاي تغيِّر لون الفرقة ؟؟.

إحنا بتفصل ..بينا.. فيافي

حلوة الذكرى حنينة تخلِّد

فينا الحب الطاهر ودافي

أيوة بنغفر وبرضو ..بننسى

وإنتا وريدك ماضي إضافي

ونبدا نعيش الحب من أول

نفتح للمستقبل قلباً حافي

ممدود بالإلفة العاشت فيهو

وحب الناس الأصبح كافي

من طرف **عبير الورد** الثلاثاء يناير 30, 2018 7:18 pm

موضوع قيم جدا

شكرا جزيلا

تماضر الخنساء حمزة...كلامك اصبح جافي

تماضر الخنساء حمزة...كلامك اصبح جافي

رد: تماضر الخنساء حمزة...كلامك اصبح جافي